Certificate lem siama puh man a ni

Serchhip Police-te chuan Serchhip DC pisa aṭanga an thu dawn bawhzuiin, tribal certificate lem siama puh C Zosangpuia (46), Keiṭum Venglai an man a, thu an zawhfiah hnuah May 7, Nilaini khan Serchhip District Jail-ah dah a ni.

Thu dawn danin, Keiṭum khaw mi pakhat chuan Serchhip DC office-ah Aadhaar card lak a tum a, chumi atana tribal certificate a thil tel chu a lem (fake) nia rinhlelh a nih avangin SDO (Sadar) Rebecca Laldinmawii Hrahsel chuan Serchhip Police Station-ah FIR a thehlut a ni.

Serchhip Police-te chuan thubuai ziak lutin an chhui zui a, tribal certificate chu a lem ngei a ni tih finfiahin, tribal certificate lem siamtu nia hriat C Zosangpuia chu an man ta a ni.

C Zosangpuia hi tun hmain Serchhip DC office-a thawk ṭhin a ni a, document lem kaihhnawih avangin a hna aṭangin bàn a ni. Common service centre (CSC) license neiin Keiṭumah CSC kaltlanga document pek chhuah theih hrang hrangte dan angin a pe chhuak ṭhin.

Tun hnaiah an khuaa mi pakhat, ram danga hna thawka kal tur chuan Aadhaar card a mamawh a, chumi atana hman turin tribal certificate lem a siamsak a, man chhuah a ni ta a ni.