Sum lama AI hman ṭangkai dan zirho

Governor Gen. Dr Vijay Kumar Singh chuan nimin khan Mizoram University auditorium-ah 'National Workshop on AI-Driven Financial Empowerment for Mizoram' a hawng. Larsap chuan, computer hmanga thil tih (digitisation) chu eirûk tihbona hmanraw pawimawh a nih thu a sawi.

Gen. VK Singh chuan, artificial intelligence (AI) hmangin tun hma lama thil tih theih loh leh mihring tana awlsam taka tih zung zung theih lohte hun rei lo te chhunga peih theih a nih thu a sawi a, "AI hmanruate hi financial literacy kalpui nan ṭangkai taka hman theih a ni a, entrepreneur, loneitute leh ṭhalaite bakah, mipui nawlpuiin ṭangkai taka hman theih a ni. Digitisation lamah ṭan lak a, ṭha taka kalpui a ṭul a, hei hian langtlang, innghah ngamna leh rinawmna a keng tel a, eirukna tihbo nan hmanraw pawimawh a ni," a ti.

Governor chuan, Indian Institute of Technology - Bhilai-in hmarchhak bial tana Tribal Area Sub Plan Scheme hnuaia AI driven financial technology project 36 a kalpui zinga 11 Mizorama kalpui a ni chu a lawm thu a sawi. Larsap hian sorkar laipui Department of Science & Technology hnuaia Tribal Area Sub Plan Scheme hmanga project leh entrepreneur ṭanpuina pekte tarlanna lehkhabu tê a tlangzarh.

Workshop hi MZU, Department of Science & Technology leh IBITF, IIT-Bhilai te buatsaih a ni a, vawiinah chhunzawma zawh a ni ang.

National Mission on Interdisciplinary Cyber-Physical Systems chuan IIT-Bhilai hnenah technology innovation hub (TIH) din nan sum a pe a; IIT-Bhilai chuan financial technology huangah MZU tan project paruk leh NIT-Mizoram tan project panga a ruahman a ni.