Minister-in hlawhtlingte a lawmpui

Minister of state Lalnghinglova Hmar chuan a bial Aizawl West-II chhung mi HSLC Examination 2025-a top 10-a langte leh MPSC Combined Competitive Examination 2024-a tlingte hnenah May 6, Thawhlehni tlaiah khan a pisaah lawmpuina a hlan.

Minister hian HSLC 2025-a pasarihna Arza Lalawmpuii, Dawrpui Vengthar leh pakuana Steven Lalawmpuia, Kanan Veng te hnenah hùnmawi leh laptop a pe. MCS-a tling thar C Lalchhandami, Kanan Veng leh Lalhruaizela, Dinthar leh, MPS-a tling thar Andrew Laldosanga Ralte Rengci, Kanan Veng te hnenah hùnmawi leh Rs 20,000 ṭheuh a pe bawk.

Lalnghinglova Hmar chuan, HSLC-a hlawhtlingte chu a lawmpui thu sawiin, "Zirlai nih lai chuan hlawhtlinna ropui tak ni mah se, in bul ṭanna chauh a ni. Pên khatin hma in sawn a, a lehpek a la awm," a ti a; an kal zelna turah duhsakna a hlan.

MPSC Combined Competitive Exam-a hlawhtling tharte chu an thawhrim rah an seng a, a lawmpui thu sawiin Minister chuan, "Phaiahte kan kalin all India service leh central service dangah Mizo dàwr tur an awm ṭhin lo hi rualawh a na duh a, chuvangin, tumna kan nei a nih chuan theihtawp chhuahin bei ila, a tluk a awm lo. Tuna kan service-ah pawh rinawm leh dik takin kan hnaah ṭhahnemngai ila, ram tana hnathawk kan ni tih i hre reng ang u," a ti.