HSLC Top 10-a Mizote chawimawina hlan; HM-in tumruhna nen zir turin zirlaite a chah

MZP chuan nimin khan Vanapa Hall-ah High School Leaving Certificate 2025-a top 10-a tling Mizo zirlaite chawimawina hun an buatsaih a; khuallian Home minister K Sapdanga chuan, tumruhna nen zir chhunzawm zel turin zirlaite a chah.

Home Minister chuan, taimakna tluka thil ti thei a awm lo tih vawng reng tur zirlaite a chah a, "Taimakna, tumruhna leh teirei peihna nen lehkha in zir chhun­zawm loh chuan tuna in aia thiam lo leh nang­mahni tluk lo nia in ngaihte hian kum 5-10 a ral ang a, in rin loh chhungin an pêl duai thei che u a ni," a ti.

Mizo mipui rualawhna leh tuna ramin a mamawh chu all India service-ah Mizo an luh chungchang a nih thu sawiin Sapdanga chuan, "Mizoten kum 10 chuang IAS direct-a inziak tling kan nei tawh lo a, IPS pawh kan neih lohna a rei tawh hle. Chonaah ngaiin all India service-ah lut turin theihtawp lo chhuah rawh u," a ti a; district hrang hrangah Mizo DC leh SP duhna thawm ring mah se, Mizo an tlem tawh avangin dah tur an awm loh thu a sawi.

K Sapdanga chuan, UPSC result a chhuahin vai ho zinga tling tam tak chu engineering leh medical degree nei an nih thu sawiin, "Chuti a nih chuan khawiah nge kan Mizo nula leh tlangval technical course zir zote chu ni ve ta le? Mizoram sorkar hnuai ringawta lungawina zawng lo turin kan lo hmuak dawn che u. Tun aṭangin kum 6 chhung IAS nih tumin han zir ṭâng ṭâng u la, in hlawhtlin hlauh chuan in thiante'n kum 30/35 an nghah kha vawi leh khatah in lehpêl ang a, anmahni enkawltu in ni thei dawn. India rama Mizo hnam chawimawitu in ni bawk ang," a ti.

MZP president H Lalthianghlima chuan, MZP-in HSLC top 10-a Mizo langte an chawimawi ṭhin chhan chu, Mizo zirlaite inkârah inelna thianghlim a awm theih nan a nih thu a sawi.

MZP-in HSLC 2025-a ti ṭha chawimawina an hlante hi mipa 13 leh hmeichhia pakua an ni a; topper hnenah Rs 10,000 leh thuchei hlanin, mi dang zawng hnenah Rs 5,000 leh thuchei an hlan a ni.