Leivûng leh bawlhhlawh paih danah inkaihruaina/dan mumal zawk siam rel

Aizawl khawpui tuia châwmtu Tlawng lui nut chhan zir chianga hma la turin Chief Minister kaihhruai High Level Committee din a ni dawn a; leivûng leh bawlhhlawh paih danah tun aia ṭha zawka inkaihruaina leh dan mumal zawk siam rel a ni.

Nimin khan Public Health Engineering (PHE) minister Prof. Lalnilawma hoin Secretariat conference hall-ah PHE, Disaster Management & Rehabilitation leh Aizawl Municipal Corporation hotu te, Central YMA, Centre for Environment & Social Justice (CESJ) leh Save The Riparians hruaitute an ṭhukhawm a; tun hnaia Tlawng lui tui nut nasat vanga harsatna thleng an sawiho.

Tlawng tui nut chungchangah department mal anga hmalak mai theih a nih loh avangin department hrang hrangte nen ṭangho a, zau zawka sawiho leh hmalak a nih theih nan Chief Minister kaihhruaina hnuaiah High Level Committee din ni se, an ti a; leivûng/bawlhhlawh paih chungchangah tun aia ṭha zawk inkaihruaina leh dan mumal zawk siam an rêl.

Tlawng lui dung enkawl leh tuihnate humhalhna atan a hranpaa master plan duan a ṭul thu te, dan loa leivûng paih ṭhinte laka hremna khauh zawka lek a ṭul thu leh, The Mizoram (Protection of Rivers) Act 2023 a taka hman a ṭul thute sawi a ni.

Prof. Lalnilawma chuan, Tlawng lui chu Aizawl khawpui tui tlan a nih avangin mi zawng zawngin an vei a ṭul thu sawiin, "A humhalhna kawngah sorkar department leh tlawmngai pawl hrang hrangte kan ṭanho a, mipuite zirtir a ṭul. Tun hnaiah tui awm reng si, mahse, tui a nut zual vanga pump theih loh a awm zeuh zeuh a, hengte hi a chhan hriat a, hmalak ngaihnaahte hmalak vat a ṭul," a ti.

PHE department hotute tarlan danin, kumin April leh May thla chhungin tui a nut avangin tui an pump tam thei lo. Tui nut zawng (turbidity) tehna NTU-ah ei/in tlaka ngaih chu 5 a ni a, chutih laiin Tlawng tui a nut zual laiin NTU 900-1,400 inkarte a ni ṭhin. Hei vang hian tui tihthianghlim a hautak a, khawlin a tawrh theih avangin tui pump theih zat a tlahniam ṭhin a ni.