Drone hmangin Aizawl zir chiang ṭan

National Geospatial Knowledge-based Land Survey of Urban Habitations (NAKSHA) hnuaia Aizawl leilung awm dan drone hmanga zirchianna tur chu nimin khan Land Revenue & Settlement (LRS) minister B Lalchhanzova'n Mualpui Helipad-ah a vailiam. Drone hmang hian pilot project angin AMC ward XI-XIX chhunga veng 43 zir chian hmasak a ni dawn.

B Lalchhanzova chuan, NAKSHA chu sorkar laipuiin pilot project anga a kalpui mek thu sawiin, a hlawhtlin chuan inhmun, lo, ram chhinchhiah (record)-te vawn dan a tihchangtlun dawn bakah, nasa takin hmasawnna a thlen dawn thu a sawi.

Drone hmanga zirchianna chu property record leh khawpui data ṭangkai tak a nih a beisei thu sawiin Minister chuan, "He project hnuaia data hmang hian ram buai leh enho ngaite pawh dawhkanah chiang taka en theih a ni tawh dawn. Data-te chu hmang ṭangkai duh department hnenah LRS department-in a hmantir thei dawn a ni," a ti.

NAKSHA pilot project bul ṭannaa zir chian tur veng 43-te chu - Luangmual, Chawlhmun, Tanhril, Tuivamit, Rangvamual, Phunchawng, Sakawrtuichhun, Tuikual North, Tuikual South, Dinthar, Dawrpui Vengthar, Vaivakawn, Kanan Veng, Khatla, Khatla East, Khatla South, Mission Vengthlang, Bungkawn, Maubawk, Bungkawn Vengthar, Nursery, Lawipu, Bethlehem Veng, Bethlehem Vengthlang, College Veng, Venghlui, Republic Veng, Republic Vengthlang, Upper Republic, Mission Veng, Thakthing, Venghnuai, Salem Veng, ITI Veng, Damveng, Tuikhuahtlang, Model Veng, Kulikawn, Tlangnuam, Hlimen, Melthum, Saikhamakawn leh Tlangnuam Vengthar te a ni.

NAKSHA PROGRAMME

* India rama khawpui 153 thlan chhuahah land record ṭha zawk siam tum a ni.

* Mizoramah February 18, 2025 khan India rualin LRS Minister-in a hawng.

* Aizawla bul ṭan nan ground control point-te siamin, helicopter hmangin LiDAR leh photogrammetry survey neih a ni tawh a; tunah hian drone hmangin thla lak leh a ni dawn.

* Drone-in map a siam (generate) hmangin leilunga endikna (ground truthing) kalpui leh a ni ang.

* Ram neitu bakah local council leh khawtlang hruaitute thawhpuina a ngai dawn.

* LRS department bakah, UDPA leh AMC te nen thawhhona ṭha a ngai dawn a, data pawh inṭâwm tur a ni.