HSSLC 2025-ah zirlai 9,817 hlawhtling; Pass percentage nikum aiin a sang zawk

Mizoram Board of School Education (MBSE) chuan nimin chhun dar 12 khan Higher Secondary School Leaving Certificate (HSSLC) Examinations 2025 result a tichhuak a, zirlai exam 12,105 zinga 9,817 hlawhtlingin, pass percentage 81.10% a ni a, nikum 2024-a pass percentage 78.04% aiin a sang zawk.

HSSLC Examination 2025-ah hian exam hmachhawntu zirlai 12,105-te chu regular student 12,028 leh private candidate 38 an ni a; regular student zingah 9,779 (81.30%) an pass a, private candidate zinga 38 (49.35%) an pass. Pass zawng zawng mi 9,817-te chu mipa 4,391 leh hmeichhia 5,426 an ni.

Zirlai hlawhtling 9,779 zinga 701 chu distinction-ah an pass a, regular student vek an ni. First division-ah zirlai 3,250 (regular 3,237 & private 13), second division-ah 3,970 (regular 3,961 & private 9) leh third division-ah 1,896 (regular 1,880 & private 16) an pass.

Compartmental chance nei zirlai 91 (nikumah 52) awmin, regular student 90 leh private pakhat an ni a; zirlai 2,197 (18.15%) an fail a, regular student 2,159 leh private candidate 38 an ni. Fail percentage hi nikum (21.52%) aiin a hniam zawk.

Stream pathuma ti ṭha ber (topper)-te hmeichhia vek an ni a, nikum 2024-ah khan mipa vek an ni thung. Stream pathuma top 10-ah mi 41 langin, mipa 20 leh hmeichhia 21 an ni. A pumpuiah mipa pass percentage 79.19 a ni a, hmeichhia 82.71% a ni thung.

Arts-ah Lalrammawii Tochhawng d/o Reuben Lalrinkima, Khatla East, Mount Carmel School pakhatna a ni a; top 10-ah mi 16 langin, hmeichhia pakua leh mipa pasarih an ni.

Science-ah Cynthia Lalhlupuii Shangpliang d/o Kyrshanbor Shangpliang, Falkland Veng, St. Paul's HSS pakhatna a ni a, HSLC 2023-ah khan pakhatna a lo ni tawh. Science top 10-a lang mi 15 zinga pariat chu mipa an ni a, pasarih chu hmeichhia an ni.

Commerce-ah Kristin Laldinpuii Ralte d/o Lal­sangliana Ralte, College Veng, Aizawl, Oikos HSS pakhatna a ni a, top 10-ah mipa leh hmeichhia panga ve ve an lang.

Arts-ah zirlai exam 8,658 zinga 6,938 hlawhtlingin, pass percentage 80.13 a ni a; distinction-ah mi 409, first division-ah 1,841, second division-ah 2,909 leh third division-ah 1,779 an pass. Zirlai 1,651 an hlawhchham a, compartmental chance nei mi 69 an awm.

Science-ah zirlai exam 2,798 zingah 2,396 (85.63%) an hlawhtling a, zirlai 388 hlawhchhamin, compartmental chance nei 14 an awm. Distinction-ah zirlai 228, first division-ah mi 1,260, second division-ah 856 leh third division-ah 52 an pass.

Commerce-ah zirlai exam 649 awmin, mi 483 (74.42%) an hlawhtling a, zirlai 158 an hlawhchham. Distrinction-ah zirlai 64 an pass a, first division-ah mi 149, second division-ah 205 leh third division-ah 65 an pass a ni.

Zirlai pass vekna sikul - arts-ah 46 (nikumah 54), science-ah pariat (nikumah pahnih) leh commerce-ah pahnih (nikumah paruk) a awm a; zirlai fail vekna sikul - arts-ah pahnih (nikumah pahnih) leh commerce-ah pahnih (nikumah pakhat) a awm a, science-ah fail vekna sikul a awm lo.