Kum 2025-26 LMC budget atan Rs 24,63,97,208 ruahman a ni
May 2, 2025-a Lunglei Municipal Council (LMC) Board of Councillors ṭhukhawm chuan kum budget 2025-26 budget atan Rs 24,63,97,208 (nuai 2,463.97) an pawm. LMC huam chhungah Garbage Free City Lunglei Project kalpui tum a ni.
LMC BoC meeting hall-ah BoC ṭhutkhawm hi chairman Lalzuithanga'n a kaihruai a; LMC sorkara Finance changtu executive councillor Zorinsanga Hmar-in kum 2025-26 atana LMC sum hmuh dan tur leh sum hman dan tur ruahman (budget) Rs 24,63,97,208 a pharh a, pawm a ni.
LMC budget-a a lan danin, kum 2025-26 chhungin tax & non-tax revenue aṭangin Rs 20,86,73,000 leh capital receipts-ah Rs 3,77,24,208 hmuh beisei a ni.
BoC ṭhukhawm chuan kumin aṭangin LMC huam chhungah Garbage Free City Lunglei Project kalpui an rêl a, Ward-1 (Pukpui leh Zotlang), Ward-2 (Serkawn leh Zohnuai), Ward-9 (Salem Veng leh Lunglawn) leh, Ward-11 (Lungleizawl, Zobawk South & North)-ahte pilot project anga kalpui phawt ni se, an ti.
Garbage Free City Lunglei Project hi kum tin ward dangah kalpui belh zelin, kum thum chhungin LMC ward 11 tuam chhuah vek an rel a; state sorkar sum leh urban local body grant aṭanga hmalak dan ngaihtuah an rel a ni.
Ṭhutkhawmah hian LMC huam chhunga ui leh vawk khuahkhirhna dan hman lailawk tur pawm a ni a; LMC hnuaia co-terminus-a thawkte medical leh travel allowance bill theihna tur ruahmanna pawm a ni bawk.
LMC BoC meeting-ah hian kum 2024 chhungin LMC parking fee aṭangin Rs 18,31,349 hmuh a ni tih tarlan a ni. Parking fee aṭanga sum hmuhte chu a vaiin mipui tan hman tura tih niin, Lungleia traffic marking bakah, kawngpui siamna atan hman a ni ang.
PROPERTY TAX CHUNGCHANGA RUAHMANNA
* State sorkarin LMC chu property tax 2024-25 khawn phalna a pek tawh angin inbuatsaih mek a ni.
* Property tax hi ward committee kaltlangin ward development-ah 80%, local council kaltlanga hmasawnna hna thawh nan 15% leh LMC-ah 5% kal tura ruahman a ni.
* Property tax khawn tur chungchang mipuiah inhrilhfiahna neih hmasak tum a ni.
* Property tax khawn chu mipui hnenah a luang lêt tih mipuiin an hriat chian theih nan talkshow leh thil dang hmanga mipui zirtir tum a ni.