LADC CEM atan N Zangura ruat a ni

Governor Gen. Vikash Kumar Singh chuan Lai Autonomous District Council (LADC) chief executive member (CEM) atan N Zangura a ruat.

LADC CEM atana N Zangura ruatna notifi­cation chu District Council and Minority Affairs (DCMA) secretary Zodingpuii'n nimin khan a tichhuak a; Lai Autonomous District Council (Constitution, Conduct of Business, etc) Rules, 2010 Rule 21(4) tlawhchhanin Governor-in LADC CEM atan N Zangura a ruat thu leh ni 10 chhungin thlawptu a ngah leh ngah loh fiah (vote of confidence) tura tih a ni.

N Zangura hi December 2020-a LADC inthlanpuiah M Kawnpui bialah independent candidate niin, member of district council (MDC) atan thlan tlin a ni a; ZPM-ah lutin, kumin March thlaa V Zirsanga kaihhruai ZPM sorkar thlâwptu zingah a tel. April thla khan BJP a zawm a, MNF MDC-te nen United Democratic Alliance dinin, CEM atan ruat a ni a, CEM tura ruat a nihna chu Larsapin April 30, 2025-ah a pawmpui a ni.

Thu dawn danin, N Zangura hian MNF MDC 11-te nen sorkar an siam dawn a, Congress party MDC pakhatin a thlawp dawn bawk a ni. N Zangura hi CEM atan lak luh a nih chuan tuna LADC sorkar term kal mekah CEM lak luh ṭum ngana a ni ang.

December 2020-a inthlanpuiah MNF-in hneh takin sorkarna an siam a, Manghmuna Chinzah chu CEM a ni a, chumi hnuah MNF sorkarah tho dingin V Zirsanga CEM atan lak luh a ni. Kum 2024 khan MNF MDC eng emaw zatin MNF an chhuahsan avangin MNF leh Congress ten sorkar inṭâwm siamin, Congress MDC awmchhun C Lalmuanthanga chu CEM atan lak luh a ni a; CEM-in thlawptu a ngah tâwk loh avangin February 27, 2025 khan ZPM sorkar a piang a, V Zirsanga chu CEM atan lak luh leh a ni.