Private clinic leh hospital-te thawhpuina kan mamawh - CM

Chief minister Lalduhoma chuan, sorkarin damdawi-inte tichangtlun turin theihtawp a chhuah thu sawiin, "Sorkar hmun­hmain min daih sêng lo a, private clinic leh private hospital lamte thawhpuina kan mamawh," a ti.

CM Lalduhoma hian nimin khan Bazar Bungkawnah Kidney 360 Dialysis Centre a hawng a, thu sawiin, "Mizote kan fing tial tial a, kan hriselna kan hlut tial tial dawn. Sorkar hmunhmain min daih sêng lo a, private clinic leh private hospital lamte thawhpuina kan mamawh a ni," a ti a; private clinic/hospital-te an inthuam ṭhat ve zel avangin a lawm thu a sawi.

Chief Minister chuan, hriselna lamah hmanraw changtlung zawk mamawhna a sang zel tih sawiin, "Sorkarin theihtawp kan chhuah a, kan ICU-te chu hna thawk theiin kan siam deuh vek tawh a, thawktu pawh kan la thar nasa," a ti.

Kidney 360 Dialysis Centre chu mipui mamawh tak a nih thu sawiin Lalduhoma chuan, "Mizoram Universal Health Care Scheme zawmtu a nih bakah, inentirna man a tlâwm bik leh zel a, mi harsa zawkte ban phak facility changtlung tak a ni," a ti a, super specialist ṭhutchilh ni chunga mi harsa zawkte ban phâk a nihna chu Centre tihlutu a nih thu a sawi.