MV Enforcement Checkgate hawng

Transport secretary Zosangliana chuan nimin khan Phunchawnga lirthei endikna tur leh phurh theih chin bituk aia rit phurte enfiahna tur, Motor Vehicle (MV) Enforcement Checkgate a hawng.

MV Enforcement Checkgate-ah hian Mizoram sorkar leh Green Hills Infrastructure-te bultumin weighbridge dah a ni a; Green Hills Infrastructure hian a bun hna buaipuiin, enkawl zui pawh an buaipui ang.

Zosangliana chuan, Transport department-in Vairengte, Rengtekawn leh Kanhmunah te MV Enforcement Checkgate a neih thu leh, Rengtekawna mi chu Phunchawnga hawn thar hmangin thlak a nih dawn thu a sawi.

Checkgate-ah hian Transport department enforcement staff-te'n ni tin chhun zan zawma an vil dawn thu sawiin Zosangliana chuan, "Lirthei pung zel hian a ken tel pakhat chu dan bawhchhiatna pung hi a ni a, tuna checkgate hawn tharah hian lirthei, a bikin bungraw phur chi hote'n dan phal chin aia rit an phur em tih uluk taka endikna tur weighbridge dah a ni," a ti.

Motor Vehicles (Amendment) Act, 2019 Section 194-in a tarlan danin, bungraw phur chi lirtheite'n an phurh theih zat aia rit an phurh chuan Rs 20,000 chawi bakah, ton khat zelah Rs 2,000 chawi belhtira hrem theih a ni.