Lungleia bandh neih tum sût a ni

Mizo Zirlai Pawl (MZP) Headquarters, Lunglei chuan vawiina Lungleia total bandh huaihawt an tum chu an sût.

Nimin chawhma lam khan Lunglei MZP hruaitute chu Lungleia MLA ṭhenkhatte nen Lunglei DC Conference Hall-a an ṭhukhawm a; MLA-te chuan, Mizoram sorkarin Pukpui leh Mausen inkar kawng siamna tur cheng vbc 45 a dah tawh bakah, Mausen leh Kanghmun South inkar siamna atan cheng vbc 58.99 dang dah tih an hrilh a ni.

Lungleia MLA-te chuan Mausen-Kanghmun South inkar siamna atana sum dah vbc 58.99 bak pawh a ṭul anga dah belh zel turin sorkar a inhuam tih an sawi bawk.

MZP Hqrs, Lunglei hruaitute chu nimin chhun dar 12:30 khan an pisaah an ṭhukhawm a, Lungleia MLA-te thil sawi chu an ngaihtuah. Sorkar hotute aṭangin an thil phûtte tihhlawhtlinna tur an hmuh avangin vawiina total bandh huaihawt an tum chu sût an remti ta a ni.