MLA-in HSLC pakhatna lawmpui

High School Leaving Certificate (HSLC) exami­nation 2025-a pakhatna PC Lalṭhakimi d/o Darṭhuama (L), Armed Veng chu bialtu MLA B Lalchhanzova, minister of state chuan nimin khan a pisaah lawm­puina thilpek a hlan.

B Lalchhanzova chuan, a bial chhung mi HSLC-ah pakhatna a ni chu a lawm tak zet tih sawiin, "Ka hriat tirh aṭangin ka phûr hle. Zirna lamah hi chuan tàwpin tài nei loin phûr tur tih hi ka ngaihdan a ni. Ngaihsan tur dik, chawimawi tur dik kan chawimawi thiam zel a ṭul. Zirna hi sorkar hna thawhpuina tur kher a ni lo a, mahni kea min dintir theitu, rilru dik min puttir theitu leh mi dangte tana malsawmna min nihtir theitu a ni," a ti.

Aizawl East-II Bialtu MLA hian PC Lalṭhakimi hnenah hian laptop, printer, Rs 10,000, thuchei leh lehkhabu eng emaw zat a pe a ni.

B Lalchhanzova hian PC Lalṭhakimi lawmpuina a hlan rual hian, a zirna sikul, Aizawl East-II chhunga awm tho KD High School, Saron Veng thuneitute hnenah lawmpuina Rs 10,000 leh thuchei a hlan bawk.

Lawmpuina inhlan­naah hian PC Lalṭhakimi chhungte bakah, bialtu corporator Christina Roluahpuii Sailo, School Education secretary David Lalthantluanga leh director Angela Zothanpuii leh Armed Veng khawtlang hruaitute an tel a ni.