Hmeichhe tleirawlte tan chhûl cancer vênna damdawi pek tum

Champhai District Task Force on Immunization chu April 29, Thawhlehni khan DC conference hall-ah additional DC K Zorammuana hoin an ṭhukhawm a; hmeichhe tleirawlte tan chhûl cancer vênna damdawi, human papillomavirus pek tuma hmalak mek a nih thu tarlan a ni.

Champhai chief medical officer Dr PC Lalhmingliana chuan, hri danna hmangin zâwnghri (small pox) leh natna dang tam tak ûm bo a nih tawh thu leh natna dangte pawh ûm bo tuma hmalak mek a nih thu a sawi.

District Hospital-a paediatrician Dr Biak-thansangi tarlan danin, sorkar hmalaknain naupang pakhat tan a thlâwnin hri danna (vaccine) Rs 80,000 man pek ṭhin a ni a; hmeichhe tleirawlte tan chhûl cancer venna vaccine (human papillomavirus) pek tuma hmalak mek a ni.

Ṭhutkhawmah hian Champhai district-a hri danna pek chungchanga harsatna hrang hrang leh a chinfel dan turte sawiho a ni.