Minister-in HSLC result-ah lawmthu a sawi

School Education minister Dr Vanlalthlana chuan, Mizoram Board of School Education (MBSE)-in HSLC Examination 2025 result April 29, Thawhlehnia an tichhuak chu lawmawm a tih thu leh pass percentage 76.68 a tling chu lawmawm a tih thu a sawi.

MBSE-in April 29-a HSLC 2025 result a tihchhuah hnuah Education Minister hian thuchah a tichhuak a, "HSLC result a hun taka chhuah a nih theih nana thawktu te, MBSE officer leh staff te, zirtirtute leh thawktu dangte thawhrimnaah lawmthu ka sawi a, an ṭanrualna avangin result lawmawm tak kan hmu a ni," a ti a; zirlai 76.68% an pass chu lawmawm a tih thu sawiin, "Kum hmasaa pass percentage 73.37 khûm a ni hi a lawmawm hle a ni," a ti.

Zirlai hlawhtlingte thinlung taka a lawmpui thu sawiin Minister chuan, "An kal zelna turah ram tana chhawr tlak hlawhtlinna paw chhuak ngei tur leh ram leh ram hmangaihna rilru nena lehkha zir zel turin duhsakna ka hlan a, hlawhtling zo ta lote ka tawrhpui a, an hlawhchhamna hi beidawn nana hmang lo a, tumruhna nasa zawk neih phah nana hmang tura ka duh," a ti a; zirlai hlawhtling rih lote chu zirna chawlhsan lo a, ngawrh zawka zir chhunzawm turin a chah.

Dr Vanlalthlana chuan, zirlai pass vek nei sikul 107 an awm chu lawmawm a tih thu sawiin, "An thawhrimna leh ṭanrualna a chhuanawm hle a ni," a ti a, result duhawm tak neih chhunzawm zel turin duhsakna a hlan. Zirlai fail vekna sikul 13 a awm chu pawi a tih thu sawiin, "Heng sikulte hian hmasawnna paw chhuak turin theihtawp chhuah se ka duh," a ti.