CM-in wine siamtu pawl a kâwm

Mizoram tlawha lo zin mek All India Wine Producers Association hruaitute chu chief minister Lalduhoma'n nimin khan a pisaah a kâwm a; Mizoram tana an rawtnate ziaka thlen turin a chah.

CM Lalduhoma chuan, Mizoram Liquor Prohibition Amendment Act hman a nih thu sawiin, "Rules kan buaipui mek," a ti a; rawtna an neihte ziaka thehlut tura chahin, "In rawtnate chu kan dante nen a inhne rem thei dawn em tihte kan en a ngai dawn a ni," a ti.

AIWPA president Jagdish Holkar chuan, Mizoram chu grape leh thlai dang, wine siam theihna chite hmanga khualzinte hîp thei khawpa siam theih nia an hriat thu sawiin, "Wine board ṭha tak awm se hmalak a awlsam zual ang," a ti a; tuna wine siam mekte chu a ṭha thawkhat a, tihchangtlun deuh erawh a ṭula an hriat thu a sawi.

Jagdish Holkar chuan, grape, balhla, lakhuihthei, dragon fruit, sapthei leh kiwi te Mizoramah chíngin wine siam theih a nih thu a sawi a, "Loneitute'n an hlâwkpui bakah, a siam lama tuite tan eizawnna tam tak a siam dawn. A siam lama tuite inzirna tur incubation centre pawh kan din thei ang," a ti.