Chak zawka ESI kalpui dan tur sawiho

Employees’ State Insurance Corporation Regional Board Mizoram chu April 29, Thawhlehni khan Labour, Employment, Skill Development and Entrepreneurship (LESDE) Directorate conference room-ah an ṭhu. LESDE minister Lalnghinglova Hmar-in a kaihhruai a, Mizorama Employees’ State Insurance (ESI) Act chak zawka kalpui theih dan tur sawiho a ni.

Lalnghinglova Hmar chuan, ESI Commission chu mipui tan thil ṭangkai tak a nih thu sawiin, mi tam zawk an inziah luh theih nan awareness campaign uar tak kalpui a duh thu a sawi a, "Aizawlah ESI hospital din a nih thuai theih nan chak taka hmalak a pawimawh a, kei pawhin theihtawp chhuaha bawhzui ka tum a ni," a ti.

Ṭhutkhawmah hian ESIC regional director (NE Region) Robert Guite, insurance commissioner (NE) SH Pranay Sinha, Guwahati-a ESIC state medical officer Dr Hiranmayee Sarma leh Mizorama ESI hotute'n Mizorama ECIC hmalakna kalpui tawh dan leh hmachhawpte an tarlang.

Meeting-a tarlan danin, kum 2023-24 chhung khan ESIC, Mizoramah mi 2,710 an inziak lut a, inziak lut tawh zawng zawng chu mi 6,180 an ni. ESIC hian India ram pumah damdawi-in (hospital) 161, dispensary 1,574, medical college 13 an thawhpui mek.

Mizoram bikah ESI hi damdawi-in panga leh diagnostic centre pathum nen an inthlun zawm a; chu'ngah chuan a thlâwnin inenkawl dawn theih a ni. ESI Dispensary-ah a thlawnin inentir/inenkawl theih a ni bawk.

ESI hi AMC huam chhungah December 1, 2015 aṭangin kalpui niin, Zodin Square-ah branch office a awm a; Zaluta Building, Venghluiah ESI Dispensary kalpui mek a ni.

ESI scheme hian sumdawnna eng pawh (road transport, hotel, restaurant, cinema, media/newspaper, sumdawnna dawr, zirna-in, etc.), thawktu mi 10 leh a aia tam awmnate a huam a, inziah luh theih a ni. Hnathawktuin a hlawh aṭanga 0.75% thla tin a pek a ngai a, a chhawrtuin 3.25% thla tin an chhûn luh a ngai bawk.

MIZORAMA ESI THLUN ZAWMTE

1. Synod Hospital

2. State Referral Hospital

3. Adventist Hospital, Zotlang, Aizawl

4. Nazareth Hospital, Chaltlang

5. Greenwood Hospital, Bawngkawn

6. Trinity Diagnostic Centre, Zarkawt

7. Genesis Laboratory, Dawrpui

8. Cross Imaging, Dawrpui