Dan loa industry ram luahtute show cause notice an pe dawn

Commerce & Industries minister F Rodingliana hoin nimin khan a pisaah dan loa industry ram luahtute chungchang sawiho a ni a, show cause notice pek ni se, an ti. Sawihonaah hian Land Revenue & Settlement (LRS) minister B Lalchhanzova leh official-te an tel.

Ṭhutkhawmah hian Industrial Growth Centre (IGC), Luangmual leh Export Promotion Industrial Park (EPIP), Lengte huam chhunga harsatna hrang hrang awmte chingfel tura hmalakna kal mekte thlirho niin, chak zawka hmalak zel dan tur sawiho a ni.

Industrial area chhunga dan loa awmte leh dan anga hmunhma pek, pek ang ni loa hma late chungchang chingfel tura department pahnihin joint meeting neih tawha thurel bawhzui tawh dan leh joint task force-te hmalakna enho a ni a, na zawka hmalak zui turin an rêl.

Dan loa industry ram luahtute chu showcause notice pek ni se an ti a; thupek zâwm lote chu The Mizoram (Land Revenue) Act 2013 Section 101-na tlawhchhanin pawisa chawitir tura hmalak tum a ni. Revenue dana inziak angin thil dik lo titute chu Rs 10,000 thleng chawitir theih an ni a, sorkar thu an zawm loh luih zel chuan ni tin Rs 5,000 zel chawitir theih a ni bawk.

Industries Minister chuan, IGC Luangmual, EPIP Lengte leh Industrial Estate, Zuangtui te dan loa luahtute leh allotment pek dan ni loa hmangtute chu insasengna hun sorkarin a pek tam tâwk tawh thu a sawi a, "Industry ramte hi din a nih ang taka entrepreneur-te'n industry din a, eizawnna ngêlnghet neih nana an hman ṭangkai theih nan heng harsatnate chinfel a hun tawh," a ti.

LRS Minister pawhin thu sawiin, "Industry ram buai chingfel turin Revenue department-in theihtawp a chuah dawn a, chumi tur chuan inter-departmental coordination ṭha a pawimawh. Hmalaknate chawlhsan lailawk fo loa ûm zui ngar ngar a ṭul a, a hlawhtlinna hmu tura âtchilh a pawimawh," a ti a; minister-te tel kher lo pawha indawr tawn fo a, chak taka hma la turin official-te a chah.