LADC sorkar ṭhiata inthlan buatsaih turin LSA-in Governor an ngen

Lai Students Associa-tion (LSA) Gen. Hqrs chuan Lai Autonomous District Council (LADC) sorkar ṭhiat a, inthlan buatsaih tura ngenna Governor hnenah ziakin an thlen.

Nimin khan Lawngtlai Press Club-ah LSA hruaitute'n thuthar theh-darhtute an kâwm a; LADC sorkar chungchanga Governor hnena an thu thlen chungchang sawiin, "Tuna LADC sorkar term kal laiah sorkar ding lai inpaih thlakna thleng reng mai hian ram hmasawnna tur a dâl. MDC-te chêt duh dan hi ram mualphona a ni," an ti.

Sorkar thar a pian theih nan inthamna leh chanvo ṭha intiamkamnate pawh a awm nia an hriat thu sawiin LSA hruaitute chuan, "LADC MDC-te'n mimal hamṭhatna an ûm nasat avangin LADC a mualpho," an ti a; LADC sorkar ṭhiat a, inthlan a nih thuai theihna atan hma la tura ngenna April 29, Thawhlehni khan ziakin Governor hnenah an thlen tihthu an sawi.

LSA hruaitute chuan, LADC-ah sorkar ngêlnghet a awm theih loh avangin eng party mah sorkartir an remti dawn lo tih an sawi a, "Hma kan la chhunzawm zel dawn," an ti.

December 2020 khan LADC inthlanpui neih a ni a, LADC term kal mekah ṭum li sorkar a inthlak tawh. Tunah hian ZPM party kaihhruai sorkar a ding mek a, chutih laiin BJP leh MNF MDC-te chuan sorkar siam tumin hma an la mek a ni.