Methamphetamine kg. 47.511 man a ni

Mizoram Police-a CID (Special Branch) chuan April 29, Thawhlehni chawhma dar 11:30 vel khan Zemabawk North-ah methamphetamine kg. 47.511 an man.

Mizoram Police tarlan danin, CID(SB) hian an thu dawn bawhzuiin April 29 khan zing kar aṭangin Tuirial leh Zemabawk inkarah operation an nei. Champhai aṭanga Aizawl pana tlan lirthei pahnih chu chawhma dar 11:30 khan Zemabawk North Presbyterian biak-in bulah an lo tiding a, uluk taka an enfiah hnuah methamphetamine kg. 47.511 an hmu chhuak a ni.

Methamphetamine kg. 18.939 chu KIA Seltos MZ-01 AD-6157 aṭangin man a ni a, a khalhtu chu T Vacheuliana (37) s/o Thangchhunga, Champhai Vengthlang a ni. KIA Sonet MZ-01 AC-3237 aṭangin meth kg. 28.572 man a ni bawk a, a khalhtu chu Samuela (38) s/o Tlangluta, Champhai Vengthlang a ni.

Meth-te hi car body lining leh dashboard beam chhungah thuhruk niin, chàr hnan a ni a; an man tak kg. 47.511 chu cheng vbc. 6.176 hûa chhût a ni. Meth phurhna lirthei leh a khalhtute man nghal niin, thubuai ziah luh a ni.