KHAWTHLIR

HSSLC result

Mizoram Board of School Education chuan May 6, 2025 (Thawhlehni) chhun dar 12-ah Higher Secondary School Leaving Certificate (HSSLC) Examination 2025 result a tichhuak dawn. Result hi MBSE Office, Chaltlang leh MBSE Regional Office, Lungleiah te, website www.mbse.edu.in leh www.mbseonline.com ahte en theih a ni ang.

Lak luh khap

Aizawl bawrhsap Lalhriatpuia chuan thupek chhuain, Aizawl district chhungah danin a phal chin bâk kuhva leh bungrua rêng rêng lak luh leh phurh khap a nih thu a puang. Thupek hi thla hnih chhung atan a ni a, thupek bawhchhiate chu BNS 2023 Section 223 hmangin hrem theih an ni.

Insawifiah turin Retailer-te hriattir

Champhai district civil supply officer CC Sakhawliana chuan, Champhai leh a chhehvela retailer-te chu ration card thar Rs 20 aia toa an hralh chhuah chungchangah May 2, 2025 hma ngeia DCSO hnenah ziaka insawifiah turin a hriattir a; Rs 20 aia toa an hralhna zawng zawng chu mipui hnena pe let vek turin a hriattir bawk. Champhai DCSO hian April 28, 2025 khan hriattirna a tichhuak a ni.

Governor ṭanpuina

Governor Gen. Vijay Kumar Singh chuan Governor’s Discretionary Fund aṭangin Champhai district-a home pali tan ṭanpuina Rs 45,000 a pe chhuak a; Larsap aiawhin Champhai DC Mohammad Aaquib chuan April 29, Thawhlehni khan a sem. Thutak Nunpuitu Team-ah Rs 15,000 pek a ni a, Reformation Centre, Rose Childrens Home leh Genesaret Childrens Home-ah Rs 10,000 ṭheuh pek a ni.

MHIP jubilee lawm

MHIP, Tualpui Branch chuan nimin khan an din champha vawi 50-na, golden jubilee an lawm a, bialtu MLA Prof. Lalnilawma, minister of state-in a hmanpui. Minister chuan, Mizoramah ruihhlo a hluar em em a, mipain an khawih nasa zual tih sawiin, "MHIP-te hian mipate dinhmun in ngaihtuah a ṭul hle, kan fapate kan enkawl kawngah hian ṭan la thar leh turin ka sawm che u a ni," a ti.

Heroin hawng 40 man

Excise & Narcotics department (END) chuan nimin zing dar 8 vel khan Zokhawthar kawngah Rohlupuia (38) s/o Sangliana, Tuirial Airfield Veng nia inchhál hnen aṭangin heroin (no. 4) gram 451.100 (hawng 40) an man. END hian Rohlupuia'n heroin phurhna atana a hman Ignis car MZ-01 AD-3270 pawh an hrêng nghal a; he thila inhnamhnawih nia sawi pawh court phalnain man tumin an bawhzui mek. Rohlupuia hi nimin khan Champhai District Court-ah hruai nghal a ni.

Zuar lo turin END-in an chah

Excise & Narcotics department chuan, Hnahlan leh Champhai winery-a siam wine ni lo, mi ṭhenkhatin thei leh sêr leh thil dang hmanga alcohol tel wine leh in tur chi dang an siam zuar leh in ṭhin Mizoram hmun hrang hrangah an awm tih an tarlang a, "Hengte hi danin a khuahkhirh mek a ni a, dan tlawhchhana hrem theih a ni," an ti a, zuara lei lo tur leh in lo turin mipui an chah.