HSLC 2025-a hlawhtlingte lawmpui

Zirlai pawlte leh political party hrang hrangte chuan thuchhuah siamin, Mizoram Board of School Education (MBSE)-in High School Leaving Certificate Examination 2025 result a tihchhuahah an lawm thu leh zirlai hlawhtlingte an lawmpui thu an tarlang.

MZP chuan, MBSE-in hun rei lo te chhunga result felfai tak tichhuak thei tura an thawhrimnaah an lawm thu an tarlang a; nikum aia pass percentage a ṭha chu hmasawnnaah an ngaih thu sawiin, "Zirlai hlawhtling zawng zawng kan lawmpui tak zet. Compartmental chance nei zirlaite nasa zawka inbuatsaih chhunzawm turin kan ngen a, hlawhtling zo ve ta lo zirlaite kan tawrhpui a, hlawhtlinna chang ngei tura bei sauh sauh turin kan fuih a ni," an ti. HSLC top 10-a lang Mizo zirlaite hnenah chawimawina an hlan dawn thu an sawi bawk.

ZPM party chuan, HSLC 2025-a zirlai hlawhtlingte an lawmpui thu leh la hlawhtling lote chu beidawng loa hma lam pan zel tura an duh thu an tarlang a; kumin HSLC-ah nikum aia pass percentage 3.31%-a a sang zawk chu lawmawm an tih thu an sawi.

ZPM chuan, "Dona leh sawiselna tam tak kara zirna hmanga kan ram siamṭha tura theihtawp chhuahtu School Education minister Dr Vanlalthlana leh a thawhpuite ṭhahnemngaihnain rah ṭha a chhuah mek hi lawmawm kan ti tak zet a ni," an ti a; School Education department-a thawk te, zirtirtu ṭhahnemngaihna leh zirlai nu leh pate inpekna fakawm an tih thu an tarlang.

MNF party chuan, HSLC 2025 result tihchhuah a ni chu lawmawm an tih thu leh hlawhtlingte an chhuan thu an tarlang a, "An kal zelna turah duhsakna kan hlan a, thiamna sang zawk nena ram leh hnam tana chhawrnahawm ni vek turin kan chah. Hlawhtling ve rih lote beidawng lo a, beiseina thar nen rim zawka thawka an hlawhtlin hun duhsak takin kan thlirpui a ni," an ti.

ZPM Ṭhalai chuan, MBSE-in tluang taka HSLC 2025 result an tihchhuah avang leh MBSE-a thawkte leh zirtirtute thawhrimnaah an lawm thu an tarlang a, "Hlawhtling zawng zawng kan lawmpui a, ram leh hnam tana chenfakawm tak ni turin duhsakna sang ber kan hlan," an ti a; hlawhtling rih lote beidawng lo a, tumruhna leh taimakna nena hlawhtling ngei turin duhsakna an hlan.

Congress party zirlai pawl, National Students' Union of India (NSUI), Mizoram State chuan, HSLC 2025-a hlawhtlingte an lawmpui thu sawiin, "Ram leh hnam tan chenfakawm tak ni tur leh an thiam leh finnate Mizoram tana hmang turin duhsakna kan hlan," an ti a; hlawhtling zo lote chu beidawng lo tur leh hlawhtling ngei tura hma lam pan turin duhsakna an hlan a ni.