MUP-in General Assembly an hmang; "Upate duat thiam a pawimawh" - K Sapdanga

Mizoram Upa Pawl (MUP) chuan nimin khan Vanapa Hall-ah General Assembly vawi 50-na an hmang a; khuallian Home minister K Sapdanga chuan, upate duat thiam a pawimawh thu a sawi.

MUP inkhawmpui hi an president Nghak­lianmawia'n a kaihruai a; K Sapdanga chuan, "Kum upa, tawnhriat ngah tawh tak takte Mizo khawtlangah an hlu hle. Ṭhangtharte'n heng kan ro hlute hlut thiam leh zah thiam hi kan mawhphurhna pawimawh a ni. Kum lama upa, tawnhriat ngah tak takte intelkhawmna MUP din a nih aṭang hian khawtlang leh ram inkaih­hruainaah an thawh hlâwk hle a ni," a ti.

Hom Minister chuan, MUP-in chhuanchham leh mi harsate ṭanpui leh dâwm kân hna an thawk ṭhin chu entawn tlak a tih thu sawiin, "Pawl din chhan leh thil tumte tihhlawhtlinna kawnga hma in lak ṭhinna a fakawm," a ti a; inchhungkhur leh khaw­tlangah ṭhalai zawkte'n upate duat a, zah thiam a, zah taka enkawl an intihhmuh a pawimawh thu a sawi.

MUP General Assembly-ah hian MUP member nikuma inkhawmpui leh kumina inkhawmpui inkara thi mi 1,804 sûnna hun hman a ni.

MUP general secretary K Thanmawia tarlan danin, MUP hi January 4, 1957 khan din a ni a, member 70,102 an awm mek a; tar pension dawng mi 24,524 an awm.