HSLC 2025-ah zirlai 14,527 an pass; HSLC 2024 aiin pass percentage a sang

Mizoram Board of School Education (MBSE) chuan nimin chhun dar 12 khan High School Leaving Certificate (HSLC) Exami­nation 2025 result a tichhuak a, zirlai exam 18,946 zinga 14,527 (76.86%) an pass a, pass percentage hi nikum aiin 3.31%-in a sang zawk.

HSLC 2025-ah hian pakhatna chu PC Lalṭhakimi d/o Darṭhuama (L), Armed Veng, KD High School, Aizawl a ni a; top 10-ah mi 24 langin, mipa 14 leh hmeichhia 10 an ni a, hnam dang pahnih an tel. Nikum khan top 10-ah mi 14 langin, mipa paruk leh hmeichhia pariat an ni.

Exam hmachhawntu zirlai 18,946 zinga 18,603 chu regular student niin, private-a exam mi 343 an awm a; regular student zingah 14,367 (77.23%) an pass a, private candidate zinga 160 (46.65%) an pass. Zirlai 4,355 an fail a, nikumah 4,837, 2023-ah 5,162 an fail a, kum 2022-ah 4,928 leh 2021-ah 2,856 an fail bawk. Compartmental chance nei zirlai 64 an awm a, nikumah 59 leh kum 2023-ah mi 62 an awm.

Zirlai exam 18,946 zinga 8,875 chu mipa niin, 10,071 chu hmeichhia an ni a, hmeichhia 1,196-in an tam a; pass zingah mipa aiin hmeichhia 707-in an tam zawk. Mipa 6,910 pass-in, percentage 77.86 a ni a, hmeichhia 7,617 pass-in, pass percentage 75.63 a ni.

Distinction-ah zirlai 1,343 an pass a (kum 2024-ah 1,332); first division-ah zirlai 3,763 (2024-ah 3,801), second division-ah 5,785 (2024-ah 5,564), third division-ah zirlai 3,636 (2024-ah 2,921) an pass bawk.

HSLC 2025-ah hian zirlai exam zawng zawng pass vekna sikul 107 a awm a, fail vekna sikul 13 a awm. Candidate zawng zawng pass vekna sikul hi nikumah 85 a awm a, kum 2024-ah 107, kum 2023-ah 98, 2021-ah 175, 2020-ah 65, 2019-ah 72 leh 2018-ah 105 an awm. Zirlai fail vekna sikul nikumah 18, kum 2023-ah 14, kum 2022-ah sikul 15, 2021-ah pasarih, 2020-ah 16, 2019-ah 24 leh kum 2018-ah 15 a awm.

Tun hnaia HSLC Examination-a pass percentage zat chu - kuminah 76.68%, nikum 2024-ah 73.37%, kum 2023-ah 71.14%, kum 2022-ah 70.64%, 2021-ah 82.43%, 2020-ah 68.33%, 2019-ah 67.93%, 2018-ah 76.65%, 2017-ah 72.17%, 2016-ah 71.17%, 2015-ah 68.30%, 2014-ah 67.51%, 2013-ah 58.63% leh kum 2012-ah 72.27% a ni.