HSLC Examination 2025 neih laiin zirlai hnawhchhuah ngai an awm lo
Mizoram Board of School Education (MBSE) chairman JH Zoremthanga chuan, HSLC Examination 2025-ah exam laia thil dik lo tih vanga hnawhchhuah ngai an awm loh thu a sawi a, sikul 713 zinga 13-ah zirlai exam-te an fail vek chu vanduaithlak a tih thu a sawi bawk.
HSLC 2025 result tihchhuah hnua thuthar thehdarhtute'n an kawmnaah JH Zoremthanga chuan, HSLC exam tluang taka an zo thei leh ruahman lâwk anga result an chhuah theihna tura thawktute chungah a lawm thu a sawi a, "Education department pumpui kan ṭangrual em em a, centre superintendent leh invigilator-te'n discipline an lekkawh ṭhat avang leh exam kaihhruainate an kenkawh ṭhat avangin disciplinary action lak ngai leh naupang entawn hnawhchhuah ngai an awm lo hi a lawmawm," a ti a; Police leh Health department-te pawhin an mawhphurhna ṭha takin an hlen tih a sawi.
HSLC 2025-ah sikul 713 aṭangin zirlai 18,946-in exam an hmachhawn thu sawiin Zoremthanga chuan, "Zirlai pass vekna sikul 107 a awm laiin candidate fail vekna sikul 13 a awm a, heng sikulte hi a tlangpuiin hmun kilkhawra awm leh zirlai nei tlem an ni. Zirlai zawng zawng an fail vek chhan tak hi kan hriatpui lo a, School Education department lamin an la chhui zui turah ngai ang," a ti.
JH Zoremthanga chuan, kuminah compartmental chance nei zirlai 64 an awm thu sawiin, "Compartment exam turte an exam vat a, result an neih thuai theih nan leh an zir chhunzawm zelna turah awlsam zawka admission an hmuh theih nan result complaint hun ni sarih chauh kan hawng," a ti a, compartment exam buatsaih thuai an tum thu a sawi.
MBSE Chairman sawi danin, HSLC 2025-ah hian zawhnate LOTS (Lower Order Thinking Skills) aṭangin 60% siam a ni a, a bak 40% chu application leh HOTS (Higher Order Thinking Skills) aṭanga siam a ni thung. Zirnain hma a sawnzel theih nan HOTS question telh tam deuh deuh tura ruahman a ni.
JH Zoremthanga chuan HSLC 2025-a hlawhtlingte a lawmpui thu a sawi a; la hlawhtling lote chu beidawng loa ṭhahnemngai taka zir zel turin a chah bawk.
HSLC EXAMINATION 2025 HIGHLIGHT
* Sikul 713-ah HSLC zirlai 19,303 an awm a, exam centre 130-ah zirlai 18,946-in exam hmachhawnin, exam lo 357 an awm.
* Covid-19 lêng vanga HSLC zirlai (course) 30%-a tihtlem a nih kum 2021 khan pass percentage 82.43% a ni a; hemi dawtah kumin 2025 hi hriat theih chin (kum 17 chhung)-a pass percentage ṭhat ber kum a ni.
* Social Science (SS) subject-ah fail 3,786 an awm a, subject mala fail tamna ber a ni.
* Mizo/language subject-ah fail 648 an awm a, subject mala fail tlemna ber a ni.
* Regular student bikah Aizawl district pass percentage (86.09%) a sang ber a, kum 2024-a an pass percentage 82.76% chu 3.33%-in an khûm.
* Regular student bikah Lawngtlai district pass percentage hniam berin, 56.19% a ni a; kum 2024-a an pass percentage 49.24% chu 6.95%-in an khûm.
* Science leh mathematics subject-ah full mark (100) hmu pakhat ve ve an awm.