MP leh Chin Refugee Community inkâwm

Lok Sabha MP Richard Vanlalhmangaiha chu April 26, Inrinni khan New Delhi-a a chenna inah Chin Refugee Community, Delhi-a hnam péng hrang hrang aiawh mi 12-te nen an inkâwm a; Myanmar aṭanga Mizorama raltlan zinga dan loa chetna a tawp theih nan venpui turiin a ngen.

Richard Vanlalhmangaiha chuan, "Myanmar aṭanga kan unau raltlante aṭanga sorkar phal loh ruih theih thil tawlhrûkna leh sualna dang dang Mizoramah a thleng ṭhin a, a pawi tak zet," a ti a; dan loa chetna thilte a thlen tawh loh nana vênpui tur leh thawhpui turin Chin Refugee Community hruaitute a ngen a ni.

Mizorama dan loa chêtna raltlante aṭanga a thleng ṭhin chu pawi an tih thu Chin Refugee Community hruaitute chuan an sawi a; Mizorama raltlante zir chiang a, dan bawhchhe zawnga raltlante an awm tawh lohna tura theihtawp chhuah an tum thu MP an hrilh.

Chin Refugee Community hruaitute hian India ram hmun hrang hranga harsatna an tawh dante MP hnenah an thlen a; an harsatnate lo zir chiang a, a ṭul dan anga hmalakpui a tum thu MP chuan a hrilh. Delhi-ah hian Chin raltlan mi 7,000 chuang an awm tih tarlan a ni.