MZU-in silver jubilee an lawm ṭan

Mizoram University (MZU) chuan nimin khan an auditorium-ah silver jubilee an lawm a; Governor Gen. Dr Vijay Kumar Singh, MZU chief rector ni bawkin hmanpuiin, silver jubilee logo a tlangzarh.

Gen. VK Singh chuan, MZU-in kum 25-na hmel a hmu chu a lawmpui thu sawiin, "MZU hnuaia zirtirtu, thawktu leh zirlai awm tawh zawng zawngte chu hemi thleng tura mi pawimawh takte an ni. MZU hi Mizoram bakah hmarchhak state-a zirna sang zawk tihhmasawn kawnga zirna-in pawimawh a ni a, zirna tihhmasawn nana hmanraw ṭha ber ber leh tunlai ber bera thuam a ni," a ti a; MZU chu Act East Policy tihhlawhtlin kawngah pawh a pawimawh dawn thu a sawi.

Khualzahawm ambassador (Rtd) Gurjit Singh, MZU vice chancellor Prof. DC Deka leh controller of examination Prof. Lalnuntluanga te pawhin thu an sawi a; Governor kaihhruaiin Pope Francis leh firfiakte chetna avanga Pahalgam-a thite sûnna hun hman a ni. Jubilee logo insiamsiak lawmman sem a ni a, MZU chanchin tarlanna silde show thlirho a ni bawk.

MZU silver jubilee lawmna hi April 25, 2026 thleng (kum 1 chhung) neih tur a ni a; chumi chhung chuan seminar, exhibition, awareness campaign, thing phun hnatlang, SARAS fair, blood donation camp, free health camp, music festival, faina hnatlang, mock drill leh thil dangte buatsaih tum a ni.

Mizoram University hi kum 2001-ah din a ni a; department 37 awm mekin, centre pariatin school of study 10-ah under graduate, post graduate leh doctor of philosophy programme an kalpui mek.

MZU hnuaiah hian affiliated college 40 leh constituent college pakhat a awm a; state 20 chuang aṭangin zirlai eng emaw zat awmin, ram dang (foreign) aṭangin zirlai 100 vel an awm mek bawk.