MSPMC-in kawng siam an endik

Mizoram State Project Monitoring Commitee (MSPMC) chuan nimin khan Pradhan Mantri Gram Sadak Yojana (PMGSY) Phase-III hnuaia Lunglei-Kawlhawk-Buarpui kawng km. 66.500-a thui thawm ṭhat hna thawh mek an endik.

Lunglei-Kawlhawk-Buarpui kawng thawm ṭhat hna hi Inckah Infrastructure Technologies, New Delhi-in an thawk a, FDR & Cold Mix technology hman a ni. Hna thawhna atan cheng nuai 5,834 ruahman a ni a; September 8, 2024 khan hna ṭan niin, March 8, 2026-a zawh tura ruahman a ni.

MSPMC team hi secretary Lalthanzuala Ralte hoin an thawk chhuak a, hna enkawltu PWD official-te leh contractor-te'n an lo dawngsawng. Hna thawktu leh enkawltute hian endiktute hriat duhte leh pawimawh dangte an lo hrilhfiah a; ṭha leh tlo zawka hna thawh dan tur an sawiho bawk.

MSPMC hian April 23, Nilaini khan Lunglei leh a chhehvela hna thawh hrang hrang an enfiah bawk a; hna enkawltu sorkar department-te leh contractor-te chu ṭha zawk, tlo zawk leh chak zawka hna thawh a nih theih nana rawtna an neihte leh bawhzui ngai hrang hrangte an sawipui a ni.