Rûkrûk leh ruihhloa fihlim turin Lunglei SP-in râltlânte a chah

Lunglei SP J Lalmuankima kaihhruaina hnuaiah nimin khan Lungleia YMA, Sub-Hqrs, MZP leh MSU ten Nghasih Myanmar Refugee Camp-ah awarness campaign an buatsaih a; Lunglei SP chuan, raltlante chu him taka an awm duh chuan rûkrûk leh ruihhloa fihlim turin a chah.

J Lalmuankima chuan, camp an tlawh chhan chu tihṭhaih tur ni loin, thlamuan turin a nih thu a sawi a, "In awmna hmunah hian him leh hlim taka awm in duh chuan rûkrûk leh ruihhlo lakah in fihlim a ngai. Dan loa sumdawnnate ti ve lo ang che u. Dan loa sumdawnnaa inhnamhnawih in hriat chuan a rang lamin thuneitute hnena thlen ṭhin u la, chu chu Mizorama cheng Mizote min ṭanpui ve theihna a ni," a ti.

Mizoram chhunga ruihhlo kaihhnawiha an man tam zawk chu Burma mi an nih thu sawiin Lunglei SP chuan, "Heng mite hian a inhnamhnawih ve lote an tihhmingchhia a ni. India ramah refugee ang pawha in awm theih loh laia misual tlemtê vanga in hmingchhiatna hi ṭangruala in beih lêt a ṭul," a ti a; misualte vanga hian camp-ah an awm reng theih loh a hlauhawm thu raltlante a hrilh.

He hunah hian Lunglei YMA Sub-Hqrs. assistant secretary R Laldinliana, Lunglei MZP secretary K Lalchhuanawma leh Lunglei MSU president Lalthangliana te pawhin thu an sawi.

Nghasih Myanmar refugee camp-ah hian in 23 a awm a, mi 122 an cheng a ni.