Mizoram sorkar lei dawh titawp turin Assam Forest dept. mite'n an hriattir; Chhâng lêt turin MZP-in sorkar an ngen

MZP General Headquarters hruaitute chuan nimin khan Buhchangphai huam chhung, Ramthar zau panna Chhimluang lei dawh mek Assam Forest department mite'n chawlhsan tura April 23, 2025-a an tih hmun nimin khan an tlawh. State dangin Mizoram an nêkna chu na taka chhâng lêt zel turin sorkar an ngen.

MZP tarlan danin, Buhchangphai Ramthar zau panna kawnga Chhimlung luia lei chu a ṭhat tâwk loh avangin Mizoram sorkarin Minor Irrigation hnuaiah RCC-in lei a dawh mek a ni. Lei dawh lai chu Assam Police leh Assam Forest mite'n April 23, Nilaini khan an tlawh a, Assam ram chhung nia sawiin, hna thawh mek titawp nghal tura an hriattir bakah, Hailakandi DC-in stay order a chhuah nghal a ni.

Assam sorkar hmalakna avang hian MZP hruaitute chuan nimin khan lei dawh mek chu an tlawh a; Buhchangphai VC member-te nen inkâwmin, thil thlen dan an sawiho. MZP chuan, Mizoram chhung ngeia Assam lamin thuneih an tum fo hi hriatthiam har an tih thu sawiin, "Ram humhalh turin theihtawpa dodal zel ni se," an ti.

MZP chuan, Mizoram sorkarin Mizoram ramri dep khuate hmasawnna tura hna an thawk chu lawmawm an tih thu sawiin, "State dangin ramri an rawn nêkna hi na taka chhâng lêt zel turin sorkar kan ngen," an ti a; Chhimluang lei dawh chu a rang thei ang bera dawh zawh a nih theih nan hma an lak dawn thu leh, Mizoram sorkar hmalakna pawh an thlithlai zel dawn thu an tarlang.

MZP tarlan danin, Chhimluang lui lehlamah Buhchangphai khaw mite'n huan lo ram neiin, eibàr zawn nan an hmang a; chu'ng huan lo ramte hi Mizoram sorkara Land Revenue & Settlement department hnuaiah LSC neiin, Mizoram sorkarah chhiah an pe a ni. Buhchangphai VC ram pass nei eng emaw zat an awm bawk.

Ramthar zau panna Chhimluang lei dawh tlawhnaah hian Aizawl aṭangin MZP Gen. Hqrs president H Lalthianghlima leh hruaitu dangte an kal a; MZP Headquarters, Kolasib leh Sub-Headquarters, Buhchangphai hruaitute'n an ṭawiawm a ni.