KHAWTHLIR

Thisen pe

St. John's Higher Secondary School NSS chuan nimin khan Kolasib District Hospital tan thisen unit 11 an pe a, petute hmeichhia paruk leh mipa panga an ni.

Tanpuina sum hlan

Saitual DC Dr Lalngura Tlau chuan Governor hnen aṭanga fahrah leh chhawmdawl ngaite ṭanpuina tur Rs 10,000 an dawn chu nimin khan a pisaah Salvation Army enkawl Hlimna In Girls Home, Saitual hnenah a hlan.

HSLC 2025 result

Mizoram Board of School Education chuan April 29, 2025 chhun dar 12 khian HSLC Examination, 2025 result a tichhuak dawn. Result hi Chaltlanga MBSE office leh www.mbse.edu.in emaw, www.mbseonline.com ahte en theih a ni ang a; pisa kai hun chhungin phone number 9863883041 leh 9863722521-ahte whatspp leh call hmangin result ngaihven theih a ni bawk ang.

Kuhva leh cocoa enkawl dan inzirtir

Lengpuia Krishi Vigyan Kendra leh ICAR - Central Plantation Crops Research Institute, Kesaragod, Kerala ṭang dun chuan nimin khan Lengpui community hall-ah 'Agro - Techniques for Enhanced Production of Arecanut & Cocoa' tih thupui hmangin training an buatsaih. Lengpui, Kolasib, Meidum leh Lengpui chhehvela kuhva leh cocoa chingtu mi 150 vel an tel a; kuhva leh cocoa chi ṭha leh a ṭiak ṭha phun dan leh enkawl dante an inzirtir a ni.

Danloa kuhva lak luh khap

Hnahthial bawrhsap K Vanlalruati chuan thupek chhuahin, Hnahthial district-ah dan loa kuhva ro lak luh khap a nih thu a puang a, "Hnahthial district chhung khawi hmunah mah dan ang ni loa kuhva ro lak luh leh phurh phal a ni lo," a ti. Thupek zâwm lote chu BNS Section 223 hmanga hrem theih a nih thu a tarlang.

AR-in heroin man

Assam Rifles chuan April 22, 2025 khan Lunglei Hrangchalkawnah Lalbiakliana leh Malsawmzuali, Lunglei Ramthar Venga khawsa mek nia inchhálte hnen aṭangin heroin (no. 4) gram 90.45 an man. Heroin leh a kawltute hi Lunglei Police Station-ah an hlan a ni.

Aizawl By-Pass Road khar dawn

April 26, Inrinni khian Aizawl International Half Marathon neih a nih dawn avangin Aizawl Traffic SP Stephen Lalrinawma chuan Inrinni zing dar 6:00 - 9:30 inkarah Aizawl By-Pass Road, ITI Veng pêng leh Trinity Hospital inkarah lirthei tlan theih a nih dawn loh thu a tarlang. Marathon neihna tibuai thei tur lirthei chhia kawngpui dunga dahte pawh senghawi vek turin a hriattir bawk.