CADS-in heroin hawng 400 an man

Central YMA hnuaia ruihhlo do pawl, Central Anti Drugs Squad (CADS) chuan nimin zing dar 3 vel khan Saitualah lirthei pahnih aṭangin heroin (no. 4) hawng 400 (kg. 4.821) an man a; Rs 1,12,00,000 hûa chhût a ni.

Central YMA aṭanga thu dawn danin, CADS-te hian i10 Grand car MZ-01 J-8898, Thangsangpuia (28) s/o Kapchhunga, Farkawn Zawra Veng, tuna Ramhlun North-a khawsa mek nia insawi khalh aṭangin heroin hawng 200 (kg. 2.400) an man. Malsawmdawnga (29) s/o Zanghrechina, Farkawn Zawra Veng, Khawmawi, Myanmar-a khawsa mek nia insawi khalh i10 car MZ-01 H-6514 aṭangin heroin hawng 200 an man bawk.

Lirthei khalhtute hian an lirthei khalhte chu Lalhmingmawia, Ngur khua, Champhai district nia an hriat, Zokhawthar leh Khawmawi vela khawsa kual ṭhin ta a nih thu leh, heroin pawh Lalhmingmawia ta vek a nih thu an sawi.

Heroin chu Vairengte daia hnam dang hnenah pe turin Lalhmingmawia'n Rs 80,000 ve ve hlawha a chhawr thu driver-te chuan an sawi a; tun ṭum hi vawi thum an kalna a nih thu te, vawi khatnaah hawng 100 ve ve, vawi hnihnaah hawng 200 ve ve leh vawi thumnaah pawh hawng 200 ve ve an phurh thu an sawi bawk.

CYMA hruaitute sawi danin, heroin neitu nia sawi Lalhmingmawia'n ruihhlo nasa takin a tawlh tih hriain CADS-in an chhui reng a, tuna heroin an phurh pawh hi Zokhawthar aṭangin an chhui ṭan. Saitualah an ding tih hriain Saitual leh Keifang chhehvel an dap kual a, Saitual Sub-Headquarters YMA hruaitute puihnain an riahna Manase Home Stay, Ṭamdil Road, Saitual PWD Vengah an nangching ta a ni.

Heroin leh a kengtu mi pahnihte chu CADS chuan Aizawlah hruaiin, Excise & Narcotics department hnenah an hlan a; heroin neitu tak Lalhmingmawia erawh chu Myanmar lamah a tlanchhiat hman avangin man a la ni ve lo thung.

Heroin hawng 400 hi Aizawl thlenpui a nihin Excise & Narcotics hnena hlannaah Home minister K Sapdanga leh Excise minister Lalnghinglova Hmar ten an lo dawnsawnpui a ni.