CISF-te'n Lengpui Airport venhim hna an thawk ṭan

Central Industrial Security Force (CISF)-te chuan Ministry of Home Affairs (MHA) ruahman angin nimin aṭang khan Lengpui Airport-a ven-himna hna an thawk ṭan.

CISF-te'n Lengpui Airport ven hna an thawh bul ṭanna leh anmahni lawmna nimin khan Airport-ah buatsaih a ni a, director general of police (DGP) Anil Shukla-a'n a hmanpui. DGP chuan, Lengpui Airport chu Mizoram leh ram dang inpawhna atana hmun pawimawh a nih thu sawiin, "CISF-in an enkawl tur hian venhimna kawngah rah ṭha a chhuah dawn a, Mizoram himna leh hmarchhak state tan himna tam tak a thlen ang," a ti.

Anil Shukla chuan, Mizoram chu state ralmuang leh nuam tak ni mah se, tun hnaiah ruihhlo tawlh a hluar hle tih sawiin, "Dan phal loh tawlhruk thil a tam avangin hemi kawnga hma la tur hian Mizoram Police ringawt an tâwk lo," a ti a; CISF-in Lengpui Airport ven hna an thawk tur chuan kawng tam takah Mizoram Police hnathawh a puih dawn thu a sawi.

CISF hi India rama airport, industry leh hmun pawimawh dangte vengtu niin, chutiang atana a bik taka training pek an ni a; tun dinhmunah India rama airport 68 ven hna thawk mekin, Lengpui Airport hi airport an ven 69-na tur a ni.

Lengpui Airport ven hna thawk tur hian CISF mi 214 awm tura ruahman a ni a, an awmna tur peih a la nih loh avangin mi 121 an rawn kal phawt dawn. Lengpui Airport-a duty ṭhin Mizoram Police mi 76 chu hmun dangah sawn chhuah an ni tawh.