Mizoram State Sports Council Golden jubilee lawm ṭan a ni

Mizoram State Sports Council (MSSC) chuan nimin khan Aizawlah MSSC kum 50 tlin, golden jubilee an lawm ṭan. Kum khat chhung MSSC golden jubilee lawm tur hawnna atan nimin khan Torch Relay leh inkhawm buatsaih a ni.

Nimin zing karah khan Bawngkawn leh Sikulpuikawn inkarah MSSC Golden Jubilee Celebration Torch Relay huaihawt a ni a; Bawngkawn aṭanga ṭanin, infiammi chhuanawm bikte leh sport association 34 hruaitute'n meichher tlanpuiin, Sikulpuikawnah an kual a, Aizawl Tennis Court-ah Sports minister leh MSSC president Lalnghinglova Hmar hoin tawpna hun hman a ni.

Golden jubilee meichher hi kumtluanin sport association hrang hrangte'n jubilee pual tournament an buatsaihah târ chhuah ṭhin a ni ang.

Nimin chawhnu dar 2 khan Vaivakawn Cultural Centre & Auditorium-ah jubilee lawmna hawnna inkhawm buatsaih a ni a, MSSC president hmasa ber Dr H Thansanga, minister hluiin jubilee lawmna a hawng.

Dr H Thansanga chuan, MSSC-in kum 50 hmel a hmu ta chu ropui a tih thu sawiin, "MSSC hi rambuai laia Mizo ṭhalaite nun sâhâwk leh kal ngaihna hre lote an awm àwl mai mai loh a, awmze neia an nunphung her rem a nih beiseia din a ni a, hun lo kal zelah huang a zauh zel a ni," a ti a; rilru thianghlim pu a, taimakna leh tawrhchhelna neia Mizote tihmingṭha tura theihtawp chhuah zel turin infiammite a fuih.

MSSC president Lalnghinglova Hmar pawhin thu sawiin, MSSC hruaitu hmasate leh thawktute fakawm a tih thu a sawi a, "Tun dinhmuna Mizoramin sport-a a thlen chin hi a lawmawm rualin, hmasawn belhna tur kan la ngah hle. Kalphung ṭha zawk leh felfai zawk a awm theih nan theihtawp kan chhuah a, thurâwn pawh kan dawng thei reng," a ti.

Mizoram leilung fate zingah Olympian pahnih chauh an la awm chu tlàwmthlak a tih thu sawiin Sports Minister chuan, "India ramin kum 2036-ah Olympic thlen a tum a, hetah hi chuan Mizo ṭhalai ṭhahnem tak India ram aiawha an tel theih nan hmathlir mumal tak nen hma kan la mek a ni," a ti. Minister hian jubilee pual t-shirt a tlangzarh nghal a ni.

MSSC hi April 20, 1976 khan executive order hmanga din a ni a, The Mizoram State Sports Council Act, 2002 hmangin tihchangtlun a ni. MSSC hnuaiah sport association 34 an inziak lut tawh a; pawl 34-te hian MSSC jubilee pualin kum khat chhungin Mizoram pum huap intihsiakna pakhat ṭheuh an buatsaih dawn a ni.