Finance department-in MUHCS-a sorkar hnathawkte hriat tur tarlang

Finance department chuan April 1, 2025-a hman ṭan Mizoram Universal Health Care Scheme (MUHCS) chungchangah hriat fiah tâwk lo awm thei a nih avangin sorkar hnathawk (a nghet)-te tana hriattur a tarlang a; April 2025 chhungin controlling officer hnenah form duan sa hmangin family declaration thehluh tur a ni.

MUHCS chu sorkar hnathawkte'n zawm ngei tur a nih thu tarlangin Finance department chuan, "April 2025 chhungin controlling officer hnenah form duan sa hmangin family declaration thehluh tur a ni. Chhungkaw pakhatah sorkar hnathawk pakhat aia tam pawh awm se an contribute (pawisa thawh) vek a ngai. Sorkar hnathawk regular-te tan an dependent family member-te hi CS(MA) Rules, 1944 zûla kalpui a ni," an ti.

Finance department tarlan danin, dependent family member-in a huam loh chhungkaw member dangte chu scheme hnuaiah kêp theih an ni lo a; scheme hamṭhatna dawng ve thei tur chuan a hranpain mipui náwlpui anga an inziah luh ve a ngai.

MUHCS chu sorkar hnathawkte contributory healthcare scheme a nih angin, all India service officer leh central service officer, Mizorama deputation-a awmte a huam a; mahse, Mizoram sum senso awm lohna healthcare scheme dang an zawm duh zawk a nih chuan a huam lo thei bawk.