Boundary Committee an ṭhukhawm; 'Mizoram tana chânna awm lo turin theihtawp kan chhuah' - Home Minister

Mizoram State Boun­dary Committee chu nimin khan Forensic Science Laboratory conference hall-ah an ṭhukhawm. Ṭhutkhawm kaihruaitu Committee chairman K Sapdanga, Home minister chuan, ramri buai chingfel turin Mizoram tana chânna awm lo tura theihtawp an chhuah thu a sawi.

Ṭhutkhawmah hian ramri buai chungchanga April 25, 2025-a Guwahati-a Mizoram leh Assam aiawhte secretary level-a an inbiak tur chungchang thlir­ho niin, Mizoram sorkar aṭanga thu ken turte leh pawimawh dangte sawiho a ni. Inbiaknaah hian Mizoram sorkar aiawh­in Home secretary Vanlalmawia hoin palai mi pasarih an kal ang.

K Sapdanga chuan ṭhut­khawm neih a nih chhan leh thil pawimawh dangte a sawifiah a; ramri him tak, mipuite thla­muang taka an khawsak theih­na tur nawr chhuah chu an thupui ber a nih thu sawiin, "Mizoram tana chânna awm lo turin theih­tawp chhuah a ni," a ti.

January 25, 2024 khan Mizoram-Assam ramri zir chiang tur member pali awmna study group din a nih thu sawiin Home Minister chuan, "Study group hian chhuanawm takin hma an la a, anni zarah document ṭanchhan tur pawh kan nei ṭha tawk tawh hlein kan inhria," a ti a; ramri chungchanga official level-a Assam nena inbiak huna Mizorama palai turte inpuahchahna a ṭha thawkhata a hriat thu sawiin, Mizoram tan theih­tawp chhuah turin a chah.

Boundary Committee ṭhutkhawm vawi sarihnaah hian Land Revenue & Settlement minister B Lalchhanzova, adviser to CM (Political) Lalmuanpuia Punte, chief secretary mawhphurhna la mektu H Lalengmawia leh Study Group on Assam-Mizoram Boundary member-te an tel. Boundary Committee member zingah ZPM, MPCC, AAP, BJP, MZP, MSU, Central YMA, JAC on ILRFD aiawhte an tel a; ramri chungchanga mithiam sawmte leh Home department official-te an tel bawk.

Ṭhutkhawmah hian Home Secretary (Boundary Committee Member Secretary ni bawk) leh Study Group on Assam-Mizoram Boundary convener Dr Joseph K Lalfakzuala ten report an pe a ni.

Boundary Committe hi a vawi khatna atan July 30, 2021 khan an ṭhukhawm a; Sep-tember 7, 2021, November 17, 2021, Septem-ber 9, 2022, January 20, 2023 leh January 25, 2024 khan an ṭhukhawm tawh bawk.