Tripura sorkarin kut a thlâkna hmun EFCC minister Lalthansanga'n a enfiah

Environment, Forest & Climate Change minister Lalthansanga chuan tun hnaia Mizoram chhunga Tripura sorkarin kut a thlâkna, Jampui Hills-a Phuldungsei khuaa Thaidawr tlang a tlawh a; Tripura sorkarin kut an thlâkna hmun chu ṭuan leh mang ata tawh Mizo lalte luah ram leh ṭhuthmun a nih thu a sawi.

Minister hi Jampui Mizo Convention leh Phuldungsei khawtlang hruaitute'n an lo dawngsawng a; Lalthansanga chuan, "Thaidawr tlangah hian Tripura sorkarin hma a la tih kan hriatin a hmun ngeia enfiah ṭul kan ti a. He lai hmun hi ṭuan leh mang ata Mizo lalte luah ram leh ṭhuthmun a ni. Chutih rualin, helai hmun enkawl leh tuaihnûm kawngah kan lo muthlu rei hle a ni tih Jampui Mizo Convention hruaitute nen kan inkawmna aṭangin a lang a, a pawi tak zet a ni," a ti.

Lalthansanga chuan, kalphung thar mipui sorkar hnuaiah Phuldungsei leh a chhehvel chu ngaihsak zel an tum thu sawiin, "Kan Chief Minister kum 40 zet he ram tana lo bei tawhtu hian Mizoram ramri a vei a, Boundary Commission ṭha tak din niin, Assam nena kan ramri buaina chungchang pawh Boundary Commission-in a bawhzui mek," a ti a; Tripura sorkarin Mizoram chhunga kut a rawn thlak chu CM-in a ngaihthah mai a rin loh thu a sawi.

Minister chuan, Phuldungsei leh Thaidawr tlang vela cheng mipui chu lungrual taka Mizoram sorkar hmalakna thláwpa an thawhpui zel a beisei thu a sawi a; politics inchirtheh nan leh inlungrualna tichhetu atan hmang lo turin a chah bawk.