Muanna Vengin leivûng paih tur an dang

Muanna Veng Local Council leh All NGO Coordination Committee chuan nimin zing aṭang khan an veng chhung kaltlanga Durtlang Leitan rama leivûng paihna hmuna leivûng paih tur lirtheite an dang a, chhun zan zawma duty an tum.

Muanna Veng khawtlang hruaitute chuan Vanglaini zawhna chhangin, Durtlang Leitan rama leivûng paihna hmuna leivûng paih ṭhin zingah fimkhur lo taka lirthei khalh leh a paihna hmun tur ni loa paih an awm ṭhin avangin an khawtlangin harsatna an tawh ṭhin thu an sawi a, "Thla hmasa mai khan leivûng paih motor-in kan vêng mi a su hlum a, chu bakah, leivûng paihna hmun tur ni loa kawng sir remchanga paih ṭhin an awm avangin kawngpui hmangtute'n harsatna an tawh phah nasa," an ti.

Durtlang lam aṭanga leivûng paih turte chu an dan ve loh thu sawiin khawtlang hruaitute chuan, "Kan veng chhung aṭanga tlan turte kan dang a, a ṭhen chuan rawn paih luih tumin an leivûng phurhte thil dangin an rawn khuh," an ti a, mahse, chutianga tite chu an kîrtir zel thu an sawi.

Muanna Vengah Supply kudam a awm tih sawiin khawtlang hruaitute chuan, "Buhfai phur lirthei liante hi kawng sirah dinna kan ruahmanpui ṭhin a, tunah chuan a paih lohna tur hmuna leivûng paih ṭhinte'n kawng sira paih an chìn avangin kawngpui a zîm sâwt a, buhfai phurte hian dinna tur pawh an nei tam tawh lo," an ti.

Muanna Veng LC leh NGO-te hian leivûng paih tur lirthei an dan tur chungchangah thuchhuah an siam hmasa a, "Leivûng paih motor-te fimkhur loh vang hian vanduaina tâwk leh nunna chân hial an awm tak avangin Muanna Veng LC & All NGO chuan AMC leh Mizoram Truck Owners Association-ahte fimkhur tura ngenna kan lo thlen tawh," an ti. An thu thlenin awmzia a neih loh avang leh mi dang tihpalh hlau miah loa an runluih zawk emaw tih mai tura leivûng paihte an la khawsak zel avangin leivûng phur lirtheite hi an dang tih an tarlang.