Chetsualna vangin mi pathum an thi
April 14, Thawhṭanni leh nimin khan hmun pahnihah chetsualna vangin mi pathum an thi a, nimin khan vui an ni.
April 14 tlai khan Chhimtuipui luia Tuipui Ferry-ah SN Lallawmkima (12) s/o SN Thanzara leh Zakaria (8) s/o LC Jonasia, Siaha Meisavaih West ve ve an tlahlum. Thu dawn danin, SN Lallawmkima leh Zakaria hi an chhungte insu tur rualin Tuipui Ferry-ah an kal ve a, haw dawnah hmuh an nih loh avangin an chhungte'n Tuipui Ferry mite an pun. Zan dar 8 velah naupang pahnihte chu thiin hmuh an ni.
Nimin zing dar 6:30 vel khan Angely Ramngaihawmi (18) d/o J Lalrosanga, Thingsulthliah chu lirtheia chetsualna vangin a thi.
Thu dawn danin, Angely hi Thangrema (22) s/o Thangchhuana, Ngopa, tuna Zemabawka awm nen bike-in Thingsulthliah aṭangin Aizawl an pan a, Zemabawk daia Forest check gate bulah truck nen an intawh laiin an tlu a ni. Angely hi truck-in a lu-ah a chíl zui a, ká chhawn lohin a thi.
Truck khalhtu leh handyman, Silchar, Assam mi ve ve nia hriatte chu an tlanbo nghal a; police-te'n truck neitu Silchar mi an be pawp tawh a, driver leh handyman erawh nimin tlai thleng khan hmuh an la ni lo.