Mithun Multiplication Centre hawng

AH & Vety minister C Lalsawivunga chuan nimin khan Serchhip district-a Lungkawlh khuaah sial vulh punna tura din, Mithun Multiplication Centre a hawng. Centre hi North Eastern Council (NEC) aṭanga hmuh cheng nuai 531.83 sênga siam a, contractor chu AIE Construction, Tuikhuahtlang a ni.

C Lalsawivunga chuan, ram hmasawn ni turin intodelh a pawimawh hmasak thu sawiin, "Mithun Multiplication Centre-in ei leh bara intodelhna a thlen theih nan department-a mithiamte leh sial vulhtu society-te'n neitu thinlungpua ṭhahnemngai taka hma in lak a pawimawh dawn," a ti a; hri laka ran an him theih nan FOCUS 2.0 aṭangin bio security fencing beisei a nih thu a sawi.

Bialtu MLA Lalmuanpuia Punte pawhin thu sawiin, Mithun Multiplication Centre leh sial vulhah hlawhtlinna tluantling thlen turin thawktute leh sial vulha tui mite inpekna a pawimawh dawn thu a sawi a ni.

Tarlan danin, Mithun Multiplication Centre hi Lungkawlh Sial Vulh Cooperative Society-in kum 2022-a North Eastern Council (NEC) aṭanga an hmuh cheng nuai 531.83 senga siam a ni a; Centre-ah hian sial in, ven bûk (watch tower), dah hranna hmun (isolation ward), bio security fencing, solar lighting system, surgical instrument, damdawi leh ṭul dangte dah a ni. Lungkawlh Sial Vulh Society-ah hian member 62 an awm mek.