District thar 3-ah jail din turin hma la

Home minister K Sapdanga hoin nimin khan Prisons Directorate conference hall-ah Central Jail leh district jail superintendent-te'n Prisons department hnuaia hmalakna an thlir let. Saitual, Khawzawl, Hnahthial district-ah district jail din tur leh Vairengte leh Tlabungah sub-jail kalpui turin hmalak mek a nih thu tarlan a ni.

K Sapdanga chuan, jail chu misual, awm ṭha duh lo hremna hmuna ngaihna awm ṭhin mah se, insiamṭha tura inkaihhruaina leh eizawnna tlak thiamthil inzirtirna hmunah siam mek a nih thu a sawi a, "Khawtlang ralmuang siam tur hian jail enkawltute inpeknaah thui tak a innghat," a ti a; Prison-a thawkte chu an hnathawhte langsar lo mah se, an mi enkawlte nunah danglamna nasa tak thlen theitu an ni tih hre reng turin a chah.

Jail chu nun kawng dik leh ṭha inzirtirna hmun pawimawh tak a nih thu sawiin Home Minister chuan, "Jail tángte thunun tur chuan a enkawltute'n mahni invawn leh inthunun theihna an neih hmasak a ṭul," a ti.

Home secretary Vanlalmawia pawhin thu sawiin, Prisons department-a thawkte chu dan bawhchhiate hremna tipuitling tura criminal justice system-a thawktu pawimawh tak an nih thu leh khawtlang siamṭhat nana mawhphurhna pawimawh tak neitu an nih thu a sawi.

Ṭhutkhawmah hian IG (Prisons) R Vanlalsawta'n department dinhmun leh hmachhawpte a tarlang a, Home joint secretary (NP) R Lalremsanga'n thu a sawi bawk.