RD hnuaia scheme hnathawh thlirho

Rural Development minister Prof. Lalnilawma hoin nimin khan Assembly Annexe conference hall-ah RD department hnuaia scheme hrang hrang kalpui dan thlir letna (review meeting) neih a ni a; RD department hotute bakah, district hrang hranga project director leh BDO-te an tel.

Prof. Lalnilawma chuan, RD department chu mipui nena innghêng hnai ber páwl an nih avangin department pawimawh a nih thu a sawi a; mahni hnathawhna hmun ṭheuhah mipui nena inlaichinna ṭha leh minister-te leh bialtu MLA-te nen inhriatthiam tawnnaa hna thawk ṭhin turin officer-te a chah.

RD Minister chuan, sorkar chuan department hrang hrangte thawhhona (convergence) a ngaih pawimawh thu sawiin, chumi lamah chuan a theih ang anga thawkho tlang zel thei tura ngaihtuahna seng ṭhin turin thawktute a chah bawk.

Review meeting-ah hian RD hnuaia scheme hrang hrang - SAGY/DISHA, PMAY-G, BADP/VVP II, PMKSY-WDC leh MGNREGA hmanga hnathawhte thlirho a ni.