Mathlana'n Union minister 2 a kâwm

Education minister Dr Vanlalthlana chuan April 8, Thawhlehni khan sorkar laipuia Minority Affairs minister Kiren Rijiju leh Education minister of state Dr Sukanta Majumdar-te Delhi-ah a kâwm.

Dr Vanlalthlana hian Kiren Rijiju chu kawng hrang hranga Mizoram hmasawn ngaihna laite a sawipui a; sorkar laipui nen thawhhona ṭha tak neih a nih theih nan Ministry of Minority Affairs a pawimawh thu sawiin, Mizoramin ṭanpui a ngaihna zâwnah theihtawp chhuahpui ṭhin turin a ngen.

Dr Sukanta Majumdar hnenah Dr Vanlalthlana chuan, Mizoram Legislative Assembly ṭhutkhawm hnuhnung berah Mizoram State University Bill pawm a nih thu a sawi a; Mizoram State University din a nih hunah sorkar laipui puihna leh kaihhruaina an mamawh dawn tih a hrilh.

Mizoram zirna-in sang zawkte tihhmasawn nana pawimawh hrang hrangte leh sorkar laipui puih a ngaihna laite Dr Vanlalthlana hian Union Education Minister a sawipui bawk.