YMA-in raltlante enkawl dan tur mumal siam turin sorkar duh

YMA Central Coordination Committee (CCC) chu nimin khan Central YMA Hall-ah an ṭhukhawm a, October 24, 2024-a YMA Rorel Inkhawma rorelte bawhzui dan leh hmalak zel dan turte an ngaihtuah.

YMA CCC hi CYMA president Lalhmachhuana'n a kaihruai a, CYMA general secretary Prof. Malsawmliana'n hmalakna hrang hrangte a tarlang a; palai mi 222 an tel.

YMA Rorel Inkhawma rêl tawh, 'Mizorama raltlante awmna hmun tur, enkawl dan tur leh kaihhruaina mumal tak sorkarin siamin khauh takin kengkawh zui rawh se' tih bawhzui dan leh, ruahmanna lo siamtu tur CYMA-in committee a dinte hmalakna thlirho a ni a, "Hemi kawngah hian nasa zawka hmalak zel ni se," an ti.

'Ruihhlo do kawngah YMA-in tun aia chak zawkin hma la rawh se' tih bawhzui dan thlir a ni a; ruihhlo do kawngah hian chak lehzuala hmalak zel an rel. 'Mizoram chhunga kawngpui kan neihte hi a vil kawngah YMA-in hma la rawh se' tih bawhzui dan thlirhoin, "Kan ramah kawngpui ṭha kan neih theih nan nasa zawka hmalakna kalpui zel ni se," an ti bawk.