RTI Week hawn a ni

Mizoram Information Commission (MIC) leh Information and Public Relations (IPR) depart-ment-te buatsaihin nimin khan Mizoram hmun hrang hrangah RTI Week 2016 hawn a ni. Aizawlah chuan IPR Auditorium-ah IPR minister Lal Thanzara'n a hawng.

Lal Thanzara chuan, sorkarin mipuite hamṭhatna turin sum tam tak sengin programme leh scheme hrang hrang duangin a thawk ṭhin tih sawiin, "Hengte hi dik taka kalpui a nih chuan hmasawnna tham a tling. Amaherawhchu, hmun tam takah a nih tur anga hman leh kalpui a nih loh avangin mipuite a thleng zo lo ṭhin," a ti.

IPR Minister chuan, hlemhletna do turin sorkarin mipuite chanvo a siam hriat a pawimawh tih sawiin, "Tun hma chuan mipuiin sorkar programme leh scheme an kalpui dan hriat a ni ngai lo a, sorkar hnathawkte’n eng ang pawhin rawn ti se, an chungah action lak a ni ngai lo tih theih hial a ni," a ti a; tunah chuan RTI Act hmangin engkim deuhthaw a zawh chhuah theih tawh tih a sawi.

Social media lamah thu dik tâwk lo leh mipui-te tichî-âi tur a inzep ve reng tih sawiin Lal Thanzara chuan, "What-app leh Facebook lamah thil dik tawk lo nia hriatte hi post hmasa loin, RTI Act hmangin engkim deuhthaw a zawhfiah hmasak theih tawh a, chuvangin he dan hman ṭangkai tum hmasak a ṭul a ni," a ti.

IPR Minister hian RTI chungchanga essay inziahsiaka ti ṭhate hnenah lawmman a hlan nghal a ni.

RTI Week hawn in-khawm kaihruaitu infor-mation commi-ssio-ner L Hrangnawna'n RTI kalphung a sawi a; chawhnu lamah workshop buatsaih niin, Administrative Training Institute deputy director Vanlalvuana paper present zirho a ni.