Saitual leh Khawzawla damdawi-ina in sak mekte MSPMC team-in enfiah

Mizoram State Project Monitoring Committee (MSPMC) member-te chuan nimin khan khum 50 awm thei tura ruahman Saitual District Hospital complex sak hna thawh mek leh Khawzawl District Hospital-a quarters sak mekte a hmunah an enfiah.

Saitual District Hospital complex-ah hian quarters pathum - type-III quarters (block khat, unit 3), type-IV quarters (block 1, unit 2) leh type-V quarters (block 1, unit 1) sak mek a ni. Damdawi-in building tur chu Saitual Joint VC leh sorkar department-te aṭangin a hmun lai rem hmasa tura ngenna a awm avangin hna thawh lai thla 10 chuang chawlhsan a ni tawh.

MSPMC team hi deputy chief medical officer Dr V Lalremruata'n a lo dawngsawng a; Saitual District Hospital complex sak chungchanga contract agreement anga a hun taka sak a nih theih loh chhante leh harsatna sutkian dan turte sawiho a ni.

Khawzawlah chuan MSPMC team hi bawrhsap K Vanlalṭhiana, medical superintendent Dr Albert Lalhminghlua leh mi pawimawh an lo dawngsawng a; damdawi-in sak belh mek leh quarters sak mekte an endik bakah, project kal dan te, mamawh an neihte leh harsatnate sawiho a ni.

MSPMC team hi vice chairman R Lal Rinawma leh secretary Lalthanzuala Ralte bakah, member dangte an ni a; Champhaia sorkar hmalaknaa hnathawhte an endik leh ang.