FCSCA Minister-in gas pipeline a enfiah

Food, Civil Supplies & Consumer Affairs (FCSCA) minister B Lalchhanzova chuan nimin khan Ministry of Petroleum and Natural Gas bultuma Northeast Gas Grid Project hnuaia Panisagar (Tripura) aṭanga Sihhmui thlenga gas pipeline phûm mekah Mamita hnathawh dan a enfiah.

Mamit DC conference hall-a IGGL, TNGCL, FCSCA department leh Mamit DC-te nen an inkawmnaah B Lalchhanzova chuan, "Kan rama hmasawnna thil lo kal ṭhinte hi a ram neitu Mizo mipuite'n kan hriat tur ang angte chiang taka kan hriat hi kan chanvo a ni a, hriat ngei pawh kan tum ṭhin tur a ni," a ti a; mipuite'n an hriat duh apiangte hrilha zirtir ṭhin turin IGGL, TNGCL leh Mamit DC te a chah.

FCSCA Minister chuan, gas pipeline phum hna thawha hmasawnna dante thla tin thlirho ṭhin turin Mamit DC-te nen an rêl thu a sawi a, hmasawnna hna chu rang taka thawh zawh a nih theih nan theihtawp chhuah turin thawktute a ngen.

B Lalchhanzova chuan, project tihhlawhtlin hun a nghahlelh thu sawiin, "Eirawngbawlna leh lirtheia hman tur gas-te Tripura aṭanga pipeline-a a lo thlen hunah chuan mahni inah gas herh haw theih a ni dawn a, chu chuan nasa takin khawsak a tihawlsam dawn bakah, mipui tan energy security a pe dawn a ni," a ti.

TNGCL leh IGGL hotute sawi danin, Panisagar aṭanga Sihhmui thlenga gas pipeline phûm tur hi km. 127-a thui a ni a, Mamit district-ah km. 100 leh Aizawl district-ah km. 4 phûm a ni dawn a, a bak zawng chu Tripura chhunga phûm tur a ni. Hna thawhna atan cheng vbc. 491 ruahman a ni a, March 2026-a zawh hman tura tih a ni.

IGGL-in gas pipeline an phûm zawhah TNGCL-in eirawngbawlna tur natural gas chu in lamah tui connection anga herh haw theihin an sem dawn a, lirtheiin a hman chi compressed natural gas (CNG) pawh station eng emaw zatah pek chhuah turin an ruahman bawk ang.