Kângmei lakah fimkhur turin mipui chah

Lunglei District Disaster Management Authority (DDMA) chairman Navneet Mann, bawrhsap chuan hriattirna tichhuakin, khua a ṭhàl avangin kângmei tichhuak thei lakah fimkhur turin district mipui a chah.

Navneet Mann chuan, mihring, ramngaw leh nungchate kângmei laka an him theih nan hriattirna zâwm turin mipui a ngen a, "Village Disaster Management Committee indin tharin, inrálring renga awm tur a ni. Kan khaw ram chinah kângmei chhuak a awm em tih thlithlai reng ila, kângmei chhuak a awmin a tikângtu chhui chhuah chu LC/VC/LDMC/VDMC mawhphurhna a ni," a ti a; ram tikangtu hriat a nih veleh Police leh Forest department-a thawkte hriattir nghal tur a nih thu a tarlang.