Union Power Secretary kâwm

Power & Electricity minister F Rodingliana chuan April 3, Ningani khan New Delhi-ah Union Power secretary Pankaj Agarwal a kâwm a, thil pawimawh hrang hrang a sawipui.

F Rodingliana chuan, Tuirini Hydel Project tihhlawhtling tura Power Ministry-in a puihnaah lawmthu hrilhin, Tuivai leh Tlawng hydel project-te rei lo têa DPR peih tur chu funding hmuh kawngah pui leh turin a ngen.

Power Secretary hian sorkar laipuiin hmarchhak biala hydro power tam zawk siamna tura scheme duan 'Scheme for Central Financial Assistance for Development of Hydro Power in the NE Region' chu Mizoramin a chhawr ṭangkai theih nan a thawhpui tur a lo hrilh.

Pankaj Agarwal chuan, central PSU ṭha leh rintlak a zawnpui tur thu F Rodingliana a hrilh a; biak tur ṭulte a be kual nghal bawk.

Power Secretary hian Mizorama RDSS hnathawh mek, Loss Reduction Work leh Smart Metering project-te chak zawka thawk zel turin F Rodingliana a ngen a, "Ministry puihna in mamawh chuan min rawn hriattir rawh u," a ti.

10% GBS aṭanga Mizorama transmission line tihchangtlunna tur cheng vbc. 305.09 hmuh tur pawh rei lo têa pek chhuak theih a nih tur thu Union Power Secretary hian Mizoram Power Minister a hrilh bawk.

F Rodingliana hian Power Finance Corporation hotute pawh Mizoram House-ah a kâwm a; Tuivai Hydel Project siam tura hmalak mek chu PFC kaltlanga funding dan tur sawipuiin, DPR peih a nih aṭanga thla khat chhunga an tihfel theih tur thu PFC lamin an lo hrilh a ni.