Lunglei châwmtu tui lakna lui a kang

Lungleia PHE superintending engineer Zohmingliana leh department hotute dangte chuan nimin khan SE pisaah thuthar thehdarhtute an kâwm a; kumin ṭhála Lunglei khawpui châwmna atana tui lakna Tlawng lui tui chu kum dang aiin a kang nasa a, ruah a sur mai loh chuan a manganthlak hle dawn tih a sawi.

Zohmingliana chuan, Lunglei châwmtu tui lakna lui chu April 29, 2023 khan a kang tawh a, tui pump-na thlang lawka mi chu tui pump-naah hîp luh a ni. April 28, 2024-ah pawh tui a kang leh tih sawiin, "Hemi ṭum hian a hnu lawkah ruah a rawn sûr a, kan ziaawm leh hram. Kumina tui kang hi kum dang aiin a nasa a, ruah a sûr mai loh chuan a manganthlak khawp ang," a ti.

Tui dah khawlna an nei ṭha tawk tih sawiin PHE SE chuan, "Power supply a ṭha a, tui pump-na khawl kan nei ṭha tâwk a, a pump tur ber tui a awm miau loh avangin tihngaihna a awm ta rih lo a ni," a ti a; Lungleia tui harsatnain zual lam a pan zel thu a sawi.

Zohmingliana chuan, Tlawng luiah concrete gravity dam siam mek a nih thu sawiin, contractor-in zawh hun turah a zawh hman loh avangin thla 6 dang pawh seisak a nih thu a sawi a, "Pangngai taka hna zawh a nih chuan nakkum lamah chuan tun ang em ema harsatna a thlen a rinawm tawh lo," a ti.

PHE executive engineer Dr ZR Ṭhasangsuala chuan, tui a harsat avangin tui lakna hnár, Tlawng lei chhak lamah chuan insu lo turin mipui a ngen a; tui kang chhan chu ram tihchereu nasat vang a nih tel avangin mamawh tihtlem a ṭul thu a sawi.

PHE Executive Engineer chuan, Lunglei khawpui chhungah tuikhur 90 a awm mek thu sawiin, "A thianghlim em tih enfiah zel a ni a, a tam zawk chu thinghlim lo a nih vangin laboratory-ah test mek a ni," a ti a; tuikhur tui an in dawn a nih chuan chhuang so hmasa turin mipui a chah.